skip to Main Content

Обвинети за настаните од 27 април ѝ поставија ултиматум на ВМРО- ДПМНЕ

Обвинети за настаните од 27 април ѝ поставија ултиматум на ВМРО- ДПМНЕ
  • 28.08.2018

Слобода за уставобранителите или македонската јавност ќе дознае за предавството од партијата – ова е ултимативното барање на дел од обвинетите за организираниот упад во собранието до опозициската ВМРО- ДПМНЕ. Во отвореното писмо, тие пишуваат дека се подготвени да лежат затвор, па дури и да загинат за нивните идеали, но велат нема да дозволат да бидат искористени за политички пазар.

„Бараме итно и безусловно да ни ги соопштите следниве работи:
1. Ставот на ВМРО за политичкиот прогон.
2. Конкретните активности на ВМРО во заштита на нашите права и борба за правда.
3. Безусловен политички притисок за прекин на политичкиот прогон.
4. Безусловно ослободување од притвор.
5. Бојкот на Собранието на Република Македонија.
6. Улична демократија за правда.
Во поглед на нашите барања братски и вмровски ве известуваме дека евентуалните политички пресуди за тероризам во сопствената држава ќе значат пресуда за престанок на последниот баталјон за Македонија и ВМРО. Ние не се плашиме од судот на власта, се плашиме од предавството на ВМРО“ – пишува во писмото.

Рокот на ултиматумот е до 20-ти септември – датум до кој бараат најдоцна да бидат ослобдени од политичарите, бидејќи токму тие, како што пишува во писмото ги сместиле зад решетки.

„Вие, нашите водачи, сте должни да ги браните интересите на Македонецот по секоја цена. Затоа сте избрани да не водите. Во спротивно, доколку се повторува историското предавство на македонските патриоти како во историското ВМРО, ние патриотите, во духот на Божјата правда, во името на нашите семејства, во името на историските заклетви, ве известуваме дека македонскиот народ ќе дознае дека Вие се грижите само за Вашите фотељи, Македонците го бранеа Уставот, а предавството го извршија немакедонците“ – порачуваат дел од обвинетите.

Од ВМРО- ДПМНЕ до сега не го коментираа ултиматумот упатен до нив.

Повеќе од една година по организираниот упад во Собранието на 27 април, интезвно тече судската постапка против 33 лица меѓу кои и пратеници на опозцијата. Од ВМРО- ДПМНЕ до сега изразија само жалење за настраданите пратеници, новинари и службеници во Собранието, но ниту еднаш не го осудија упадот. Безбедносните камери регистрираа дел од пратениците на опозициската партија како ги отвораат вратите на толпата пред законодавниот дом, а како крајна цел, според обвинението, била нарачана ликвидација на премиерот Зоран Заев.

Христијан Баневски

Back To Top