skip to Main Content

Мета-Столтенберг: Приемот на РСM во НАТО e вистинска одлука во потребно време

Мета-Столтенберг: Приемот на РСM во НАТО E вистинска одлука во потребно време
  • 02.06.2019

Албанскиот претседател Илир Мета на средбата со генералниот секретар на НАТО, Јенс Столтенберг истакна дека неговата земја со ентузијазам го очекува скорешното членство во Северноатлантската Алијанса на Република Северна Македонија.

– Ова е вистинска одлука во потребно време, која го наградува решавањето на билатералните недоразбирања благодарение на конструктивниот ангажман на највисоките лидери на Северна Македонија и Грција, како и благодарение на незаменливата соработка меѓу САД и ЕУ, изјави Мета, соопшти неговиот кабинет.

Тој ја нагласил извонредната и од витално значење улога на Албанците од Северна Македонија во поддржувањето на оваа стратешка цел.

Според него, проширувањето и присуството на НАТО во регионов се клучни за консолидирање на безбедноста, мирот и стабилноста на Западен Балкан.

Присуството на НАТО во Косово, во тесна соработка со институциите на Косово и ЕУ, оценил Мета, придонесува за побезбедна средина и во исто време е од суштинско значење за територијалниот интегритет на Косово и стабилноста во регионот,а ја искажал и поддршката на неговата земја за „легитимното и суверено право на Косово за постепена трансформација на Безбедносните сили во армија на Косово и негова целосна интеграција во НАТО“.

– Европската и евроатлантската интеграција е единствената сигурна гаранција за консолидација на мирот, безбедноста и благосостојбата во регионот, засновани на заеднички вредности. Напредокот во овие организации е вреден за секоја жртва и напорна работа, оценил претседателот Мета.

Тој ветил дека ќе продолжи да го поддржува и охрабрува зголемувањето на буџетот за одбрана на два отсто до 2024 година, а ја поздравил и инвестицијата на НАТО во воздухопловната база во Кучово, која ќе стане прва ваква база на НАТО на Балканот, како безбедносно средство за земјата, регионот и Алијансата.

Back To Top