skip to Main Content

Димитров пред ПССЕ: Ако не можеш да јаваш на два коња, што бараш во циркузот

Димитров пред ПССЕ: Ако не можеш да јаваш на два коња, што бараш во циркузот
  • 24.04.2018

Министерот за надворешни работи Никола Димитров одржа говор во Парламентарното Собрание на Советот на Европа и соопшти кои реформи ги презела Владата во борба против корупцијата, независно судство и слобода на медиумите. Европратениците најмногу му поставуваа прашања за проблемот со името.

За тоа кои чекори ќе ги презеде Владата во блиска иднина за да го искористи моментумот, Димитров кратко рече дека следи нова рунда преговори со медијаторот Метју Нимиц и шефот на грчката дипломатија, Никос Коѕијас утре во Виена.

-Никогаш не сме имале преговори на ова ниво каде што директно разговараат министрите за надворешни работи на двете земји. Мислам дека имаме прозорец на можности, не ги знам идните чекори, но мораме да продолжиме, да дадеме се од себе, што помалку домашна политика  и повеќе стратегии толку повеќе и шанси да ги решиме проблемите. Не е лесно, но мислам дека не сме направиле доволно во минатото за да објасниме. Има слој на предрасуди и енигми, но никој не рече дека ќе биде лесно. Останува на нас да ги превртиме сите камења за да ја најдеме шансата – рече Димитров.

За очекувањата од самитот во Софија, наспроти изјавите на дел од членките во ЕУ дека се против проширување, Димитров рече дека не мисли оти тие две работи се судираат.

-Знаеме дека не сме во ситуација никој од земјите во регион да се придружи на ЕУ утре, свесни сме дека тоа е можно најрано во 2025. За нас во оваа ситуација е важен е процесот на пристапување и тоа е најважна алатка која ја имаме. Консолидацијата на Европа не може да го исклучи Балканот, тоа го покажа и бегалската криза. Сака да го завршам говорот со цитат: „Ако не можеш да јаваш два коња во исто време, тогаш што правиш во циркусот“, тука ќе застанам – порача тој.

Запрашан од грчка европратеничка како е возможно Македонија да дојде до решение на спорот иако има намера да го задржи уставното име, Димитров одби конкретно да одговори велеќи дека преговорите не треба да се водат пред очи на јавноста.

-Џонглираме меѓу две интереси, сакаме да го штитиме процесот, но и да ја информираме јавноста. Постои опасност ставовите да станат национални позиции што оневозможува продолжување на преговорите. Сите ги знаеме позициите на двете страни. Мора креативно да видиме дали може да ги поместиме елементите за да се покрие најважното за Атина и за Скопје. За да се стори тоа мора повеќе да се разговара, а по договорот да и се елаборира се на јавноста – посочи тој.

Back To Top