skip to Main Content

Генерално собрание по повод 46. роденден на ЗЕЛС и Денот на општините

Генерално собрание по повод 46. роденден на ЗЕЛС и Денот на општините
  • 26.04.2018

Aктуелните состојби и предизвиците со кои се соочува локалната власт ќе бидат тема на расправа на втората седница на Генералното собрание на ЗЕЛС што денеска се одржува во Скопје во чест на 46. роденден на Заедницата на единиците на локалната самоуправа на Република Македонија.

Според утврдениот дневен ред на седницата, претседателот на ЗЕЛС Петре Шилегов ќе зборува за активностите што се преземени во изминатиот период, а ќе биде разгледан и Финансискиот извештај на ЗЕЛС за 2017 година. Најавено е и обраќање на министерот за локална самоуправа Сухејл Фазлиу.

На 26 април 1972 година  во Салонот 19,19 во Скопје било одржано Основачко собрание на Заедницата на општини и градови на Македонија. Затоа овој датум во Статутот на ЗЕЛС е утврден како „Ден на општините“ и „Ден на ЗЕЛС“. Иницијативата што ја дале претседателите на тогашните собранија на општините Куманово, Кочани, Охрид, Скопје и Тетово била прифатена од претставниците од околу триесетина општини.

Генералното собрание е највисокото тело на ЗЕЛС, кое го сочинуваат вкупно 90 делегати. Секој делегат има право на еден глас. Градоначалниците на единиците на локалната самоуправа по функција се делегати на Генералното собрание, а претседателите на општинските совети се нивни заменици. Делегати на Генерално собрание се и деветте членови од Комитетот на советите при ЗЕЛС.

Back To Top