skip to Main Content

Во Велес концерт „Македонски ноктурна“ одржа пијанистката Ема Попивода

Во Велес концерт „Македонски ноктурна“ одржа пијанистката Ема Попивода
  • 27.09.2018

Пијанистката со светска слава Ема Попивода синоќа пред велешката публика на малата сцена во Народниот театар го изведе концертот „Македонски ноктурна“ од програмата на Димитрије Бужаровски.

Беа изведени композиции базирани на македонските народни песни „Калеш Анѓо“, „Во влашкото маало“, „Сечи моме руси коси“, „Јовано Јованке“…

Композициите се напишани во пијанистички стил на Шопен и Лист, но музиката е разбирлива и лесно прифатлива за слушање за публиката заради препознатливите теми од македонските песни.

– Каде и да сум ги свирела овие композиции и во Њујорк, и во Токио и во Лондон ,луѓето иако не ги знаат песните многу емотивно и со воодушевување ги прифаќаат и со восхит се однесуваат кон македонската музика, појасни пијанистката Попивода.

Информира дека во Велес свирела неколкупати, но првпат во оваа мала концертна сала на Народниот театар од која, како што рече, е одушевена и и било чест и задоволство да свири на оваа сцена, бидејќи изгледа како една современа концертна сала и има солиден клавир што е многу важно за еден уметник.

– Оваа концертна програма со композициите од Димитрије Бужаровски ја подготвував повеќе од една година заради тоа што композициите се комплексни и бараат добра техничка и музичка подготвеност. Со овој концерт настапував буквално во цел свет, во Њујорк, Токио, Лондон, Рим, Будимпешта, Брисел, Гдањск. Настапив со оваа програма затоа што луѓето во светот бараат да слушнат нешто ново. Публиката на моите настапи се воодушевуваат од специфичноста на нашата македонска музика која е навистина многу убава и допира до срцата на сите слушатели, па и до оние кои не ги познаваат овие композиции, рече пијанистката Попивода.

Концертот во Велес се одржа во рамки на мини концертната турнеја на пијанистката Ема Попивода во рамките на манифестацијата Нов културен бран 2018 со поддршка на Министерството за култура.

Инаку по Скопје, Охрид и Велес на 28 септември, таа ќе одржи концерт и во Центарот за култура „АСНОМ“ во Гостивар.

Back To Top